Manchester United heimsækir Barcelona í fyrri leik liðanna í umspili fyrir Evrópudeildina á fimmtudaginn, liðið sem vinnur einvígið mun komast í 16-liða úrslit keppninnar.
Með í för verður væntanlega Marcus Rashford sem hefur verið sjóðandi heitur á þessu tímabili. Hann er búinn að skora 21 mark í öllum keppnum, þar af 13 mörk eftir HM en enginn leikmaður hefur skorað fleiri mörk í fimm sterkustu deildum Evrópu á þeim tíma.
Ronald Araujo varnarmaður Barcelona er með sjálfstraustið í botni og sagði fyrr á tímabilinu að hann væri að spila sinn besta fótbolta á ferlinum. Samkvæmt spænska miðlinum AS hefur Xavi sett Araujo það verkefni að stöðva Rashford.
Araujo hefur áður á þessari leiktíð fengið verkefni að stöðva Vinicius Junior leikmann Real Madrid með góðum árangri. Þá var hann færður í hægri bakvörðinn en ekki er búist við því að svo verði í þetta sinn.